Acts 21

Paul e hana gi Jerusalem

1Gimaadou ga hagaaloho gi digaula, ga hagatanga. I muli di madau dele adu haga huudonu, gimaadou ga dau i tenua go Cos. Di laangi nomuli, gimaadou ga dau i tenua go Rhodes, mai i golo gimaadou ga lloo adu gi Patara. 2Gimaadou ga iloo bolo di wagabaalii i golo dela e hana gi tenua go Phoenicia, gei gimaadou ga kaga, ga hula. 3Gimaadou ga loomoi gi di gowaa dela e mee di gidee tenua go Cyprus, ga dele la bahi ngaaga Cyprus gi Syria. Gimaadou ga dau i Tyre di gowaa belee dugu ia nia goloo di wagabaalii. 4Gimaadou ga gidee hunu daangada hagadonu i di gowaa deelaa, ga noho i baahi digaula tabu e dahi. Mai i nia mogobuna o di Hagataalunga Dabu, digaula ga hai gi Paul gi hudee hana gi Jerusalem. 5Ga dae gi di madau madagoaa belee maaheu ai, gimaadou ga hagatanga ga hula. Digaula huogodoo, mo nadau lodo, mo nadau dama ga hula madalia gimaadou gi daha mo di waahale gi tongotai, gimaadou huogodoo ga dogoduli gi lala, ga dalodalo. 6Gimaadou ga hagadau hagaaloho i madau mehanga, gei gimaadou ga hula, ga kaga gi di wagabaalii, gei digaula ga hula gi nadau guongo. 7Gimaadou ga duudagi adu di madau ala, ga dele mai i Tyre gi Ptolemais, di gowaa dela ne haga aloho iei gimaadou gi madau ihoo hagaaloho hagadonu, ga noho i baahi digaula i di laangi e dahi. 8Dono daiaa, gimaadou ga hula ga dau i Caesarea, ga noho i golo i di hale o Philip tangada hagadele di Longo Humalia. Mee tangada e dahi i nia daangada hagamaamaa dogohidu i Jerusalem. ^a 9Gei mee ana dama ahina e dogohaa, nadau lodo ai, e hagadele nnelekai a God. 10Gimaadou ne noho i golo i nia laangi e hidu, gei soukohp dono ingoo go Agabus ga dau gi madau baahi mai Judea. ^b 11Mee ne hanimoi gi gimaadou, ga daa di tuu a Paul, ga bida lawalawa ono wae mo ono lima gi di maa, ga helekai, “Deenei telekai di Hagataalunga Dabu ne hai bolo tangada dono duu deenei la ga lawalawa beenei go digau o Jew i Jerusalem, ga wanga a mee gi digau tuadimee.” 12Di madau longono di mee deenei, gimaadou mo digau ala e noho i golo, ga tangi ang gi Paul gi hudee hana gi Jerusalem. 13Gei mee ga helekai, “Goodou e tangitangi di aha, dela e hagahuaidu ogu lodo? Au gu togomaalia, hagalee anga hua gi di lawalawa i Jerusalem, gei anga labelaa gi di made, idimaa i di ingoo o Tagi go Jesus!” 14Gimaadou gu deemee di hai a mee gi huli dono manawa, gei gimaadou ga helekai, “Go di manawa o Dimaadua la gi gila.” 15I muli hua di madau nohonoho haga dulii i golo, gei gimaadou ga hagatogomaalia madau mee, ga hagatanga, ga hula gi Jerusalem. 16Hunu dama agoago mai Caesarea gu hula madalia gimaadou, gu lahi gimaadou gi di hale o taane dela belee noho iei gimaadou i dono baahi, dono ingoo go Mnason, tangada mai Cyprus, tangada hagadonu mai i mua.

Paul e hana haga heetugi gi James

17Gimaadou ne dau i Jerusalem, gei digau hagadonu gu haga heetugi mai gi gimaadou hagahumalia. 18Dono daiaa, gei Paul ga hula gimaadou belee heetugi gi James. Gei digau mmaadua daumaha huogodoo o di nohongo dabu deelaa la nogo i golo. 19Paul ga hagaaloho gi digaula, ga helekai gi digaula nia mee a God huogodoo ala ne hai i mehanga o digau tuadimee i dana hai hegau i nadau baahi. 20I muli hua digaula ne longono a mee, digaula gu hagaamu a God. Gei digaula ga helekai, “Paul, di madau duaahina nei, goe gu gidee bolo nia daangada o Jew dogologowaahee huoloo ala ne hagadonu, gei digaula huogodoo e hagamahi e hai hegau gi nnaganoho. 21Digaula gu longo bolo goe e hai au agoago gi digau o Jew huogodoo ala e noho i lodo nia guongo o digau tuadimee bolo gi kilia gi daha Nnaganoho Moses, e hai gi digaula bolo gi hudee sirkumsais nadau dama, be e daudali nnangaahaihai digau o Jew. 22Digaula gu longono bolo goe gu dau mai. Malaa di aha dela ga hai? 23Deenei di madau mee e hiihai bolo goe gi heia: Nia daane dogohaa i ginei ala gu hai di nadau hagababa. ^c 24Goe hana dalia digaula e hai di hagadabu o di haga madammaa, e hui digaula, gei digaula ga mee di dahi nadau libogo. I di ala mee beenei, nia daangada huogodoo ga iloo bolo nadau mee ala ne longo(no)-iei ginaadou, le e dilikai, goe e daudali hua Nnaganoho Moses. 25Gei ang gi digau tuadimee ala ne hagadonu, gimaadou gu hagau ginai di lede bolo gidaadou gu hagamaanadu bolo digaula gi hudee geina nia meegai ala gu tigidaumaha ang gi nia balu god, be e inu nia dodo, be e gai nia manu ala ne haga dagamila nadau ua gi mmade, gei digaula gi haga ligaliga i daha mo di hai be di manu.” ^d 26Dono daiaa, gei Paul ga lahi nia daane, ga hai di nadau daumaha haga madammaa. Gei mee ga hana gi lodo di Hale Daumaha, ga hai gi iloo be nia maa nia laangi e hia o nadau madagoaa haga madammaa, mo di madagoaa tangada nei mo tangada nei e hai ana tigidaumaha.

Di kumi o Paul i lodo di Hale Daumaha

27Di hagaodi gi muli nia laangi e hidu o di haga madammaa, gei hunu gau o Jew mai i tenua go Asia gu gidee ginaadou a Paul i lodo di Hale Daumaha. Digaula ga hai digau dogologo aalaa gi hagalongoaa, ga kumi Paul. 28Digaula ga wwolowwolo, “Nia daane o Israel! Goodou hagamaamaa ina gimaadou! Deenei taane dela e heehee i nia madagoaa huogodoo, e agoago gi nia daangada huogodoo, e hai baahi gi digau Israel mo Nnaganoho Moses, mo di Hale Daumaha deenei. Gei dolomeenei mee gu laha mai ana gau tuadimee gi lodo di Hale Daumaha, gei gu hagahuaidu di gowaa haga madagu deenei!” 29(Digaula ne helekai di mee deenei, idimaa, digaula gu gidee Trophimus mai Ephesus e madalia Paul i lodo di waahale deelaa. Digaula e hagamaanadu bolo mee ne lahi go Paul gi lodo di Hale Daumaha.) ^e 30Di hinihini damana gu hai i lodo di waahale hagatau, nia daangada gu llele mai, ga kumi Paul, ga dada mai a mee gi daha mo di Hale Daumaha. Di madagoaa hua deelaa, digaula ga tai nia bontai o di Hale Daumaha. 31Di buini deelaa bolo ginaadou e daaligi a Paul gi made i di madagoaa di haga iloo ne dau i di tagi dauwa aamua o Rome bolo di hinihini gu hai i lodo Jerusalem hagatau. 32Gei tagi dauwa aamua deelaa ga limalima hua ga lahi ana dagi dauwa mono gau dauwa, ga hagalimalima gi lala gi di gowaa dela iei digau dogologo. Di madagoaa nia daangada ne gidee di tagi dauwa aamua i baahi digau dauwa, digaula gu noho, digi daaligidia Paul. 33Tagi dauwa aamua ga hanimoi gi Paul, ga kumi a mee, ga helekai bolo gi nnoodia a mee gi nia daula baalanga e lua, ga heeu, “Taane deenei la koai? Mee ne hai dana aha?” 34Hunu gau mai i lodo digau dogologo ga wwolowwolo i di mee e dahi, gei hunu gau ga wwolowwolo i nnuai mee. Gei di maa di hinihini dela ne hidi mai ai, tagi dauwa aamua deelaa gu deemee di modongoohia ma di aha dela ne hai. Gei mee ga helekai gi ana gau dauwa bolo gi lahia a Paul gi lodo di abaaba digau dauwa. 35Digaula ga lahi a mee gi tugi i di gaagenge o di abaaba deelaa, gei digau dauwa ga aamo a mee, idimaa, digau dogologowaahee le e hagawelewele huoloo. 36Digau dogologowaahee ga loomoi i muli o mee, e wwolowwolo, “Daaligidia a mee gi made!”

Paul e abaaba ia gi daha

37Digaula ne hoohoo adu hua di ulu gi lodo di abaaba deelaa, gei Paul ga helekai gi tagi dauwa aamua, “Au e mee di helekai dagu mee adu gi di goe ?

Tagi dauwa aamua ga heeu, “Goe e iloo telekai Greek? 38Malaa, goe hagalee go taane Egypt dela ne daamada dana hinihini damana, ga dagi ana gau daaligi dangada e haa mana(4,000) gi lodo di anggowaa?” 39Paul ga helekai, “Au tangada o Jew, ne haanau i Tarsus i lodo Cilicia, tangada donu ni di waahale hagalabagau. Dumaalia mai gi di au e helekai gi digau aanei.” 40Tagi dauwa aamua ga dumaalia gi mee, gei Paul ga duu i-nua i hongo di gaagenge, ga lialiagi dono lima gi nia daangada bolo gi haga kila. Di madagoaa hua digaula ne noho haga kila, gei Paul ga helekai gi digaula i nia helekai Hebrew.